Yogo’ yish nhéchhw kob, da’ byoj kate’ ba sjalle’ benextilhe, lhen gwnhabia’ nahua ka’, Moctezuma nha’ gok bene’ blhao beyon toz yelaxbab che benexhon walh ka’, lhen bene’ yell Chjanhilhalle’ Cristo. To koen laga’ Yish welhab che Moctezuma chho’en dilla’ kan gok iz zelhao che Yell xhen Azteca, kate’ ba gosezenhe’ Moctezuma nha’, gosenabe’ neé lhao bene’ lhalle’, nha’ yeto shlhak da’ nchhen shlha’ klhelhe, nha’ shtole’ ba nhakde’ zi’, nha’ die’ ba bosotine’ lhachhe’ walh che’. Kan gosot benextilhen Moctezuma nha’, gosonhe’ ché’ kan gok che Cristo kate’ gosote’ le’, nha’ tlacuiloquen bezie’ ka nchhén lo’ Ecce homo, nha’ kan bchhenhe’ Moctezuman, ka Cristo zelhao lla gwzoa Yelllhio. Mexica bene’ zaka’, bene’ ne sjanhak bene’ gwnhabia’, gosake’ walh da’ sjanhake’ bene’ dialla che Moctezuma, le’n bxe’ da’ shlhoe’ beseyak txhen Moctezuma nha’ Jesús, to benebda’o gwbill yoblhe lhao yelaxbab nahua.