Bene’ bda’o gwnhabia’ nha’ benexban wen lni bda’o che Yellxhon walh bosochinhe’ gwba’o da’ gosonhe’ lhen yej gwlhas, nha’ yej gwba’o, kanhíté, ench blho’en yelawalh gwnhabia’ nsa’ Yaba. Kanhak yejgwba’on, chho’en lhatj nho shlhe’ da’ nllalhetelhe ka da’ shlhe’ lhao benach. Lo’ yish welhab shilline (12), da’ da’ lo’ Yishwelhab golh Florentino, lo’ dilla’ gwkuialhao gall nhan sjanzoj wezoj ka’ nhakyanen gok bewselha’k benextilh ka’, katen beselhede’ to bellia xilhe da’ to yej gwba’o lo’ xgaba’. Kate’ blhe’ Moctezuman ka gasj ba’o nhakba’, nhachh gwkos yichjen gwne’ Yaban lliachgoan beljw, zejten tolí gan chhak lni Yi’ Kob, yi’ da’ chhokob Yelllhio, nha’ lez ka’kse blhede’ toshonj bene’ weka’ ya sjallia Kabayw.